Бриселската полиција употреби солзавец за ги спречи незадоволните земјоделци да ги пробијат полициските барикади и да се упатат кон плоштадот „Шуман“ во Брисел, каде што се наоѓаат зградите повеќе институции на Унијата, меѓу кои и на Европската комисија и Советот на ЕУ.
Според полицијата, до инцидентот дошло кога неколку трактори се обиделе да ги пробијат полициските барикади, но во тоа биле спречени од страна на полициските сили кои со солзавец ги спречиле земјоделците во оваа нивна намера.
Како што јави дописникот на МИА од Брисел, група земјоделците потпалија бали со сено во близина на зграда што се реновира, при што се запалиле градежните скелиња на објектот, па полицајците интервенираа со водени топови за гасење на пожарот и за потиснување на демонстрантите.
Друга група учесници на земјоделските протести подметнале пожар на скалите кои водат кон железничката и кон метро станицата на плоштадот „Шуман“, при што полицајците употребиле солзавец против насобраните земјоделци.
Дел земјоделци со животински измет го испрскаа големиот мурал „Иднината е Европа“ во близина на „Шуман“.
Весникот „Соар“ информира дека земјоделците со околу 250 трактори ја блокираа улицата „Лоа“ што води од центарот на Брисел кон „Шуман“, како и дека за сообраќај се затворени улиците и тунелите околу плоштадот.
На неколку улици кои водат кон т.н. „европски кварт“ на градот, каде се стационирани институциите на ЕУ, и земјоделците поставија свои барикади од ѓубриво и сено, а дел од нив ги гаѓале полицајците со јајца и петарди. Полицијата информира дека засега не е одговорено на овие провокации, но дека се подготвени водени типови за интервенција доколку состојбата ескалира.
Цел на „напади“ со јајца и петарди од страна на земјоделците беа и новинари што го следат протестот.
Протестот се одржува во организација на неколку земјоделски организации по повод денешното заседание на Советот за земјоделство и рибарство на ЕУ.
Инаку, првите земјоделци со своите трактори пристигнаа во Брисел уште синоќа околу 23 часот, запоседнувајќи го плоштадот „Луксембург“, недалеку од зградата на Европскиот парламент.
Како организатори на протестот се јавуваат меѓународната организација Виа Кампесина (Селски начин) со седиште во францускиот град Бањоле и белгиските валонски здруженија Федерацијата на млади фармери (ФЈА), Валонската земјоделска федерација (ФВА), Обединета федерација на групите на полјоделци и фармери (ФУГЕА) и Мрежата за поддршка на селското земјоделство (РЕСАП).
Ова се трети земјоделски протести во Брисел оваа година, по оние одржани на 1 и на 26 февруари, кога на земјоделците со неколку стотици трактори блокира повеќе улици околу „европски кварт“. Првиот протест мина мирно, додека на оној на 26 февруари се случија неколку инциденти, кога земјоделците запалија бали од слама и тракторски гуми во близина на плоштадот „Шуман“ и ги гаѓа полицајците со измет, петарди, портокали и шишиња, на што полициските сили одговорија со употреба на солзавец.
Инаку, утрово постојаните претставници на земјите членки на ЕУ во рамки на заседанието на Специјалниот комитет за земјоделство, го поддржаа предлогот на Европската комисија за измени на стандардите за Добри земјоделски и еколошки услови (ГАЕК), поврзани со одредени акти од Заедничката земјоделска политика (ЗЗП).
Предлогот се однесува на прашања поврзани со имплементацијата на стратешките планови на Заедничката земјоделска политика и има за цел да обезбеди поедноставување на правилата, да го намали административниот товар за земјоделството и да обезбеди поголема флексибилност при усогласувањето на земјоделците со одредени еколошки стандарди, што се едни од главните барања на земјоделските протести.
