Океан Викинг, изнајмен од невладината организација СОС Медитеран, вчера заедно со припадниците на италијанската крајбрежна стража спаси 129 мигранти, меѓу кои 43 деца, во Јонското Море, меѓу јужна Италија и Грција, соопшти организацијата.
„Спасените лица им кажаа на нашите екипи дека ја напуштиле Турција шест дена порано. Најмладиот преживеан е едномесечно бебе кое патува со својата мајка“, соопшти организацијата СОС Медитеран, чие седиште е во Марсеј, на југоистокот на Франција.
Меѓу спасените има 43 жени.
Океан Викинг сега плови со 163 спасени луѓе кон пристаништето Равена, на североистокот на Италија, кое италијанските власти го одредиле како пристаниште за спуштање. Веќе во четвртокот бродот спаси 34 мигранти од Гамбија и Сирија.
Според последните податоци на Меѓународната организација за миграција (ИОМ), од почетокот на оваа година 2.140 лица кои се обиделе да стигнат до Европа исчезнале или починале во Медитеранот.
