Израелскиот премиер Бенјамин Нетанјаху се разбуди и се опоравува по успешната операција за отстранување на простатата во медицинскиот центар Хадаса во Ерусалим. Премиерот е префрлен во подземна, утврдена единица за обновување, соопштија од неговиот кабинет.
Се очекува израелскиот премиер да помине неколку дена под надзор во оваа специјална единица поради загриженоста дека може да биде цел на ракетен напад среде тековната војна.
Во одделна изјава од болницата, шефот на одделот за урологија, професор Офер Гофрит, рече дека процедурата „одела според планираното“.
Според извештаите на израелските медиуми, министерот за правда Јарив Левин привремено ја извршувал функцијата премиер за време на операцијата, додека министерот за одбрана Израел Кац бил овластен да го свика безбедносниот кабинет доколку е потребно.
Нетанјаху, кој имаше голем број здравствени проблеми во последниве години, вложува големи напори за да го одржи јавниот имиџ на здрав и енергичен лидер. Неодамна се пофали дека работи 18 часа дневно, со пура.
