Невремето со грмотевици што ги зафати јужниот дел на САД и планините Озарк, уби најмалку 24 луѓе во четири држави и уништи стотици згради. Синоптичарите предупредуваат за влошување на временските неприлики.
Бројот на загинати за време на викендот вклучува најмалку 8 смртни случаи во Арканзас, 7 во Тексас, 4 во Кентаки и 2 во Оклахома, според официјални претставници на државната итна помош.
Гувернерот на Кентаки, Енди Бешеар, прогласи вонредна состојба рано во понеделникот, додека Националната метеоролошка служба соопшти дека предупредувањето за силно невреме со грмотевици во понеделникот било во сила во делови од Џорџија и Јужна Каролина.
Поради невремето без струја останаа околу 300.000 луѓе во седум сојузни држави.
„Тоа беше тешка ноќ за нашите луѓе“ – објави гувернерот на Кентаки на социјалната платформа Х.
Тој подоцна на брифинг со новинарите изјави дека разорните бури ја погодиле речиси целата земја. Официјални лица соопштија дека 100 државни автопати и патишта биле оштетени во невремето.
Силен град го погоди Тексас, а снимките објавени на социјалните мрежи покажуваат како топки мраз паѓаат од небото со молскавична брзина.
Националната метеоролошка служба предупреди на дополнителни бури во долините на Охајо и Тенеси, кои ќе донесат силни ветрови, град, торнада и обилни дождови кои би можеле да предизвикаат поројни поплави.
Најновите екстремни временски услови доаѓаат само неколку дена откако силно торнадо помина низ град во Ајова, убивајќи 4 лица, а повеќе торнадо пијавици го погодија Тексас минатата недела.
Во исто време, метеоролозите најавуваат дека екстремно високи температури ќе го погодат Тексас, каде се очекуваат температури и до 49 Целзиусови степени.
Во меѓувреме, САД се подготвуваат за она што владините прогнозери го нарекоа потенцијално „исклучителна“ сезона на урагани во Атлантикот што започнува на 1 јуни.
