Автомобилите со руски регистарски таблички повеќе не смеат да ја минуваат границата со Латвија. Доколку некое лице одбие да ги следи упатствата на царинските органи, вклучително и враќање во Русија или Белорусија, може да се донесе одлука да му се одземе автомобилот, соопшти одделот на Државната служба за приходи на Латвија.
Како што јави рускиот сервис на Би-Би-Си, забраната стапи на сила во вторникот. Сè уште е можно да се напушти територијата на Латвија со автомобили со руски регистарски таблички, доколку се користат како личен превоз.
Забраната за влез нема да важи за возилата наменети за дипломатско-конзуларните претставништва на Европската унија и земјите-членки, вклучително и делегации, амбасади и претставништва.
Летонија не е единствената
Претходно, Литванија престана да дозволува автомобили со руски регистарски таблички. Естонскиот министер за надворешни работи Маргус Чахна рече дека земјите од ЕУ кои граничат со Русија оваа недела ќе разговараат за тоа како да се спроведе резолуцијата за забрана на увоз на автомобили со руски регистарски таблички. Според него, Естонија има намера да ги почитува инструкциите на ЕУ.
Финска сè уште не планира да оди во таа насока. „Автомобилите со руски регистарски таблички сè уште можат да влезат во Финска. Доколку се донесе поинаква одлука, ќе ја соопштиме навреме“, изјави Пиа Саривар, шеф на одделот за санкции на финското Министерство за надворешни работи.
На 8 септември Европската комисија објави појаснувања за увозот од Русија. Според документот, забранет е увоз на патнички автомобили и лични предмети во ЕУ. Подоцна, Европската комисија изјави дека оваа листа е од советодавна природа, а земјите од ЕУ ќе треба самостојно да одлучат дали ќе воведат забрани или не.
