Министерството за образование и наука (МОН) и ЈСП Скопје се соочуваат со жестока критика од студентските организации, кои се закануваат со протести ако не се врати бесплатниот јавен превоз. Студентите тврдат дека укинувањето на оваа корист е директен напад врз нивните права, во време кога се борат со низок студентски стандард и високите трошоци.
„Неуспехот на Министерството за образование да го исплати долгот за бесплатен превоз е само уште еден доказ дека оваа власт нема капацитет да се справи со вистинските проблеми на младите“, велат од Студентски отпор.
Тие нагласуваат дека укинувањето на бесплатниот превоз ќе го отежни нивниот пристап до образованието и ќе предизвика нови финансиски проблеми за многу студенти.
„Ако не се врати бесплатниот превоз веднаш, студентите ќе излезат на улиците“, предупредуваат тие.
Според нив, оваа одлука не смее да се донесе, бидејќи пристапот до образование и образовни ресурси треба да биде неприкосновено право за сите студенти.
Борбата за враќање на бесплатниот превоз, велат тие, започнува сега, и ако властите не го решат проблемот, ќе имаат да се соочат со гневот на студентите на улиците.
