Најмоќната воена сила во земјата, Хезболах, денеска организираше собири низ Либан, повикувајќи на солидарност на арапскиот свет.
Во палестинскиот бегалски камп Бурџ ал Шемали во јужен Либан попладнево се подготвуваат за еден таков митинг. Кампот го водат различни палестински фракции, вклучително и Исламски џихад.
Новинар на Би-би-си пишува дека дошол овде за да се сретне со мајката на еден од милитантите од таа група, кој во понеделникот преминал во Израел и бил убиен од израелските одбранбени сили. Ова беше еден од неколкуте инциденти во кои беа вклучени Израел и либански милитанти кои се случија долж границата откако Хамас го нападна Израел во саботата.
45-годишната Азаб Муса рече дека е „горда“ на својот син, 22-годишниот Хамза и дека го „охрабрила“ да продолжи со нападот. „Ми кажа што ќе прави… Стоев покрај него и се погрижив да не се откаже“, рече таа.
„Да имав 10 сина, ќе ги испратев сите да го сторат истото затоа што треба да си ја вратиме земјата.
Семејството пристигнало во Либан од Сирија во 2011 година, по почетокот на тамошната граѓанска војна и никогаш не биле на местото што го нарекуваат Палестина.
Братот на Хамза, 20-годишниот Мохамед, рече дека тој не бил поврзан со ниту една група, но дека е подготвен да направи нешто слично на тоа што го направил неговиот брат. „Секој човек овде е горд на него.
Насилството долж либанско-израелската граница засега е ограничено. Но, постојат стравувања дека ако борбите ескалираат, Либан би можел да биде вовлечен во овој конфликт.
