Домаќинствата во Велика Британија во текот на зимата би можеле да останат без струја по три часа дневно, доколку дојде до значително исцрпување на залихите на гас, соопшти енергетската компанија Национална мрежа.
Од компанијата велат дека ова е „неверојатно сценарио“, но дека постои можност за прекин на снабдувањето доколку кризата ескалира, пренесува Би-Би-Си.
Ограничувањата ќе се појават во време на пик на потрошувачката, или наутро или помеѓу 16 и 21 часот.
Потрошувачите би биле предупредени еден ден однапред, а ограничувањата би биле организирани за да не се случуваат во сите делови на земјата истовремено.
Сепак, од националната мрежа не очекуваат дека ќе има проблеми за домаќинствата.
На прашањето дали може да гарантира дека нема да има прекини на струја, премиерката Лиз Трус во четвртокот рече дека Велика Британија има добро снабдување со електрична енергија.
„Ние сме во подобра позиција од многу држави, но се разбира дека можеме да направиме повеќе, и јас работам со нашите партнери за да се осигураме дека ќе имаме стабилно снабдување во иднина“, рече Трус.
ОК е силно зависна од гас за производство на електрична енергија – електраните на гас произведуваат повеќе од 40 отсто од електричната енергија во земјата. Британија увезува струја и од континентална Европа.
