Меѓународен тим научници започна со дупчење на Арктикот за да се зачуваат примероци од мраз стари до 300 години за анализа, пред да се стопат замрзнатите слоеви поради климатските промени, објавија во понеделникот организаторите на мисијата.
Италијански, француски и норвешки истражувачи поставија камп на норвешкиот архипелаг Свалбард, како дел од, како што велат, трката со времето за зачувување на клучните податоци за мразот и анализа на условите што преовладувале во неговата поранешна средина.
Научниците ќе вадат мраз со помош на долги цевки од длабочина од дури 125 метри. Има замрзнати геохемиски траги стари и до три века.
Анализата на хемикалиите во длабоките „ледени јадра“ ќе им даде на научниците вредни информации за условите што некогаш преовладувале во околината.
Но, истовремено предупредуваат дека водата создадена од топењето на мразот ги менува геохемиските траги кои се зачувани во таквиот вековен мраз.
Забележано е дека вреден „оригинален материјал исчезнува од површината на планетата засекогаш“, изјави за AFP Џером Чапелаз, претседател на Фондацијата за ледена меморија, која ја води операцијата.
„Нашата одговорност како глациолози е да обезбедиме дел од тоа да биде зачувано.
Емисиите на јаглерод предизвикани од човекот од 19 век ја загреале планетата за 1,1 степени Целзиусови, а студиите покажуваат дека Арктикот се загрева два до четири пати побрзо од глобалниот просек.
Едниот дел од мразот изваден од цевките веднаш ќе биде искористен за анализа, а другиот ќе биде испратен на Антарктикот и таму ќе се складира под снегот за да можат примероците да се сочуваат за идните генерации научници.
Осум членови на мисијата поставија камп на надморска височина од 1.100 метри на леденото поле Holtedahlfonna исполнето со пукнатини. Тие планираат да започнат со дупчење во вторник, рече Чапелаз.
Работата ќе ја вршат три недели на температури пониски од минус 25С. Во тој процес ќе сечат и извлекуваат примероци од мраз, долги еден метар и широки 10 см.
Мисијата од 700.000 евра, која е делумно финансирана од италијанското Министерство за истражување, следи по серијата слични претходни екстракции на леденото јадро од Фондацијата Ice Memory, вклучително и претходните операции на Алпите и Андите.
