НАТО соопшти дека е „решен да и помогне на Украина“ против Русија, која „не успеа да ја скрши решителноста на украинскиот народ“ по една година војна.
Русија мора „веднаш“ да ја прекине својата „нелегална војна“ и ќе мора да одговара за „воените злосторства“, соопшти НАТО.
„Продолжуваме да ја зајакнуваме нашата политичка и практична поддршка“ за Украина, се вели во соопштението објавено на првата годишнина од руската инвазија на Украина.
„Русија сноси целосна одговорност за оваа војна, флагрантно кршење на меѓународното право и Повелбата на Обединетите нации“, соопшти НАТО.
Русија „никогаш не покажа дека е навистина подготвена да работи за праведен и траен мир“, се додава во соопштението.
Членките на НАТО „ги осудуваат сите оние, особено Белорусија, кои активно ја помагаат војната што ја води Русија“, без експлицитно именување на која било друга земја освен Белорусија.
НАТО оцени дека воените злосторства и другите ужаси што ги извршиле Русите не можат да останат неказнети.
„Остануваме подготвени да го браниме секој квадратен сантиметар од територијата на Алијансата од сите закани и предизвици“, се вели во соопштението.
Се нагласува дека посветеноста на членките на основачкиот договор, кој вклучува клаузула за заемна одбрана во член 5, е „беспрекорна“. Членот 5 не се однесува на Украина, која не е членка на НАТО, туку на соседните земји, Полска, Романија и Литванија.
НАТО ја „поздравува“ одлуката на Финска, која граничи со Русија, и Шведска да се приклучат на Алијансата.
НАТО „ќе продолжи да развива партнерство со Украина, која работи на остварување на своите евроатлантски аспирации“, се вели во соопштението.
