Француските власти подигнаа обвинение против двајца мажи кои живеат во парискиот регион поради сомневање дека се поврзани со напаѓачот кој на 16 октомври уби две лица во Брисел.
Од надлежното обвинителство денеска соопштија дека осомничените се изведени пред истражен судија и дека се во притвор.
Тие се обвинети за злосторничко терористичко здружување и соучесништво во убиство во терористички потфат.
Истрагата за нивната поврзаност со напаѓачот продолжува.
Исламската држава ја презеде одговорноста за вооружениот напад во Брисел во кој беа убиени двајца Швеѓани.
Нападот бил насочен против Шведска, како што се наведува, поради нејзиното членство во меѓународната коалиција која се бори против екстремистите.
Двајца шведски државјани беа убиени во вооружен напад во близина на центарот на градот пред квалификацискиот натпревар за Европското првенство меѓу Белгија и Шведска.
Осомничениот напаѓач е убиен за време на полициска акција и потрага која траела повеќе од 12 часа.
