Најмалку девет лица загинаа во поплавите на 23 градови и места на северот во Италија. Околу 10.000 луѓе се евакуирани, а некои од нив мораа да бидат извлечени со хеликоптер. Се урна мост во близина на Болоња, регистрирани се 120 одрони, се излија 14 реки, патиштата се оштетени.
– Се соочуваме со катастрофални настани кои веројатно никогаш досега не биле видени – изјави за новинарите претседателот на регионот Емилија-Ромања, Стефано Боначини.
Градоначалникот на Равена пак, изјави дека неговиот град сега е непрепознатлив. Големата награда на Формула 1, која требаше да се одржи викендов во Имола, локација блиску до многу од најтешко погодените области, беше откажана во обид да се намали притисокот врз службите за итни случаи и да се спречат љубителите на трката да се соберат во погодениот регион.
Истовремено, реките Купа и Корана ги поплавија Карловац и Костајница во Хрватска, а големо невреме е забележано и во Словенија и Србија.
