18-годишен патник на летот на холандската авиокомпанија Трансавиа предизвика прилично метеж пред полетувањето на авионот од Ротердам за Задар. Тој со своите сопатници сподели фотографија од авионската несреќа.
Холандската нискобуџетна авиокомпанија „Трансавиа“ стави на црната листа на 18-годишник да лета со компанијата. Пред неколку дена тој заработи петгодишна забрана за летање со Трансавиа споделувајќи фотографија од авионската несреќа со своите сопатници непосредно пред полетувањето на авионот.
18-годишното момче ја сподели фотографијата од авионската несреќа со сопатниците преку системот AirDrop на Apple за испраќање или споделување датотеки. Фотографијата ја сподели непосредно пред да полета авионот за Задар, Хрватска од Ротердам. Алармираните патници веднаш ја известиле екипажот за фотографијата, а известена е и полицијата, јавува Н1 Загреб.
Според портпаролот на авиокомпанијата, испратената фотографија е протолкувана како можна закана со експлозивна направа или предвидување што би можело да се случи по полетувањето. Екипажот потоа побарал од лицето кое ги испратило фотографиите да стане и да излезе од авионот. Но, 18-годишникот одбил да го стори тоа се додека пилотот не објавил дека авионот нема да полета додека не се најде одговорното лице.
18-годишникот потоа бил изведен од авионот од страна на полицијата, а поради инцидентот бил изведен и пред судија. Како што рекол, немал лоша намера, туку фотографијата ја споделил на шега.
Авионот во кој се случи инцидентот е во сопственост на холандската авиокомпанија KLM. Летот за Задар од Ротердам доцнеше 40 минути.
