На најдобриот кошаркар во светот, Никола Јокиќ, не му се допаѓа животот кој го живее, вели дека сака да има приватност, нешто што не е вообичаено во неговата професија.
Јокиќ во разговор со својот соиграч, Мајкл Портер Џуниор откри дека воопшто не му се допаѓа тоа што е популарен, кога ќе ја заврши кариерата сака да се повлече и никој да не го познава.
– На некои луѓе им се допаѓа да бидат познати, на некои не. Кога ќе ја завршам кариерата навистина сакам никој да не ме познава. Посакувам моето дете да ме памети како татко. Мислам дека тоа е најголемата цел во мојот живот – вели Јокиќ.
– Не ми се допаѓа овој живот, ние сме кошаркари и само сме добри во тоа што го правиме. Но, медиумите се цело време околу нас, а секако дека добиваме голема плата поради медиумите, поради тоа што сме популарни. Тажно е што кога одите во бар, ресторан, некој меч, луѓето цело време ги вадат телефоните и ве снимаат. Мислам дека тоа е грубо. Јас не сум надвор за да се покажам. Друга цел ми е да немам телефон. Сакам да го живеам моментот, да бидам нормален човек. Да одам на пијачка со другарите, на ручек, да си играм со детето, да јавам коњи и никој да не прави голема работа од тоа – додава српскиот кошаркар.
Albanian
English
Macedonian
Turkish
