Годишната стапка на инфлација во еврозоната според прелиминарната проценка се зголеми од септемвриските 1,7% на 2% во октомври, соопшти денеска Евростат.
Во октомври цените на енергенсите се намалија за 4,6% на годишно ниво, со побавно темпо од септември кога се намалија за 6,1 %.
Спротивно на тоа, цените на услугите во еврозоната се зголемија за 3,9% на годишно ниво, со исто темпо како и минатиот месец, а индустриските производи освен енергијата поскапеа за 0,5% на годишно ниво, споредено со растот од 0,4 % во септември.
Цените на храната, алкохолот и тутунот во еврозоната во октомври се зголемија за 2,9% на годишно ниво, што значи забрзаа во однос на септемврискиот годишен раст од 2,4%.
Годишната стапка на базичната инфлација во еврозоната во октомври изнесуваше 2,7%, што е исто како и во септември. На месечно ниво, инфлацијата во еврозоната е зголемена за 0,3% во однос на септември.
Во врска со четирите најголеми економии во еврозоната, годишната инфлација во Германија се зголемила во октомври од септемвриските 1,8 на 2,4%, како и инфлацијата во Франција, од 1,4 % на 1,5%, Италија, од 0,7% на еден отсто и Шпанија, од 1,7% на 1,8%.
Еуростат ја мери инфлацијата со хармонизираниот индекс на потрошувачки цени, а резултатите од оваа методологија понекогаш се разликуваат од податоците објавени од земјите во еврозоната.
