Европската унија сè уште не разговарала за можната забрана на рускиот сектор за дијаманти, објави во петокот белгискиот премиер Александар Де Кро по пристигнувањето на самитот на ЕУ. Де Кро истакна дека западните санкции „мора да имаат многу поголемо влијание врз руската страна отколку врз нашата“.
– Сè уште не сум видел предлог за забрана на дијаманти на преговарачка маса. Сакам да нагласам: Белгија нема да ја блокира оваа одлука, но треба да бидете сигурни дека тоа ќе ѝ наштети на Русија, а не на земјите од ЕУ. Нема да има смисла ако протокот на дијаманти оди само во Дубаи, потребни се соодветни меѓународни решенија – рече тој.
Белгија е еден од клучните увозници на руски дијаманти за нејзината развиена индустрија за накит. Претходно, голем број европски медиуми објавија дека земјата ги блокирала дискусиите за санкциите на ЕУ за увоз на руски дијаманти.
