Министерството за внатрешни работи (МВР) објави фотографија од лицето за кое тврди дека го веело знамето на „голема Албанија“ на Градскиот плоштад во Тетово на 11 август 2023 година и побара ако некој го препознае да пријави во полиција.
„МВР ја информира јавноста дека на фотографијата обезбедена од полициските служби е лицето што го вееше знамето со т.н. ‘голема Албанија’. Ова е и начин да ги демантираме пласираните лажни вести дека сторителот на ова дело е припадник на МВР. Воедно, ги повикуваме сите граѓани доколку го забележат ова лице, имаат какви било сознанија за него или корисна информација која може да помогне во истрагата која СВР Тетово ја води во координација со Јавен обвинител, веднаш да известат во најблиската полициска станица или да пријават на телефонските броеви 192 или 112“, се наведува во соопштението на МВР.
