На рускиот генерал Сергеј Суровикин не му се непознати масовните убиства и ширењето терор.
Во Чеченија, избричен ветеран со градба на борач и строг израз вети дека „ќе уништи тројца чеченски борци за секој убиен руски војник“. Тој е горко запаметен и во северна Сирија, каде што претвори голем дел од градот Алепо во урнатини.
56-годишниот генерал на воздухопловните сили го надгледуваше немилосрдното таргетирање на клиниките, болниците и цивилната инфраструктура во Идлиб, контролиран од бунтовниците, сето тоа во обид да ја скрши волјата на опозицијата и да испрати бегалци во Европа преку Турција.
Може ли Суровикин да го сврти бранот на војната?
Таа 11-месечна воена кампања „покажа бесчувствително непочитување на животите на приближно три милиони цивили во областа“, вели Хјуман рајтс воч во жесток извештај.
Но, ниту безмилосниот Суровикин нема да може да ја смени низата зачудувачки украински победи на бојното поле и текот на војната, пишува Политико. Во текот на целата година, Украинците покажаа дека се издржливи и нема да бидат заплашени од воени злосторства – и претходно трпеа бомбардирања од исто толку бескрупулозните руски генерали.
Од друга страна, западните воени функционери и аналитичари забележуваат дека веќе има знаци на поголема тактичка кохерентност отколку во времето на неговиот претходник, генералот Александар Дворников.
„Неговите воени тактики целосно ги прекршуваат правилата за војување, но за жал тие се покажаа како ефикасни во Сирија. Како воен стратег, тој има досие за ефикасност – колку и да е злобен“, изјави за Политико висок британски воен разузнавач.
Минатата недела Суровикин и други функционери организираа бран напади врз енергетската инфраструктура во Украина, а поради нападите повеќе од милион домаќинства останаа без струја, изјави во саботата заменик-шефот на украинското претседателство Кирил Тимошенко.
„Ова се гнасни напади врз клучни објекти“, рече тогаш украинскиот претседател Володимир Зеленски, повикувајќи го светот да го запре овој терор.
„Се разбира, немаме технички можности да собориме 100 отсто од руските ракети и беспилотни летала. Сигурен сум дека постепено ќе го постигнеме тоа, со помош на нашите партнери. Веќе ги соборуваме повеќето крстосувачки ракети и беспилотни летала“, додаде тој.
Сепак, пресретнувањето на повеќето руски ракети или беспилотни летала не е доволно за да се запре нарушувањето што Суровикин сака да го предизвика со ваквите напади.
