Обвинителот на Меѓународниот кривичен суд (МКС) Карим Кан изрази загриженост во петокот поради рускиот напад врз Украина и рече дека судот би можел да истражи можни воени злосторства во земјата.
-„Внимателно ги следам случувањата во Украина… Ги потсетувам сите страни вклучени во конфликтот на украинска територија дека мојата канцеларија ќе ја искористи својата јурисдикција за да истражи каков било акт на геноцид, злосторства против човештвото и воени злосторства“, рече Кан во изјавата.
По руската анексија на Крим во 2014 година и конфликтот меѓу проруските бунтовници и украинските сили во источна Украина, Киев ја прифати јурисдикцијата на МКС за злосторствата извршени на украинска територија од февруари 2014 година.Обвинителите на МКС објавија во декември 2020 година дека веруваат дека биле извршени воени и други злосторства во областа.Првите истраги се завршени, но до судиите не е испратено официјално барање за отворање целосна истрага.
Русија не е членка на МКС и се спротивстави на судот да се занимава со случајот.
