ВМРО-ДПМНЕ и коалицијата повеќе нема да се среќаваат со власта на билатерална основа, изјави претседателот на ВМРО-ДПМНЕ, Христијан Мицкоски одговарајќи на новинарско прашање при денешната посета на Штип, при што посочи дека таквата одлука е донесена едногласно на Извршниот комитет на партијата.
– Комуникација со власта немаме, оваа недела имавме седница на Извршниот Комитет на партијата и донесовме едногласна одлука дека како ВМРО-ДПМНЕ ги прекинуваме сите комуникации официјални на билатерално ниво со претставници од владата – истакна Мицкоски.
Мицкоски потенцираше дека ВМРО-ДПМНЕ и коалицијата повеќе нема да се среќаваат на билатерална основа, официјално со претставници од владата.
Има отворен пат за брзи предвремени парламентарни избори оваа есен. На тој начин ќе ги спасиме граѓаните од дополнителни срамови, предавства кој што Бојан Маричиќ и останатите како него ги носат, вели претседателот на ВМРО-ДПМНЕ, Христијан Мицкоски во однос на изјавата на вицепремирот за европски прашања, Бојан Маричиќ кој што во телевизиско гостување истакна дека расчистен е патот за уставните измени.
Ова, претседателот Мицкоски, го истакна од Штип каде што во рамките теренската активност „Ова е Македонија за сите” присуствуваше на кино, каде што додаде дека ги разбира луѓето од власта и нивната нервоза затоа што тие немаат легитимитет и не се избрани од народот, и секој еден ден повеќе на власт за нив преставува тендер повеќе и нивно богатење.
– Јас го разбирам и Маричиќ и Ковачевски и Зечевиќ, апсолутно можам да ги разберам. Тие луѓе немаат легитимитет од народот, не се бирани од народот и за нив секој ден значи тендер повеќе, привилегија повеќе. Секој ден плус таму каде што се, не значи додадена вредност за граѓаните и за Македонија, туку значи додадена вредност лично за нив, богатење, злоупотреба и уживање во привилегиите – рече Мицкоски.
Додаде дека и тоа ќе заврши и ќе му дојде крај, но после тоа ќе треба да се соочат со институтот одговорност.
– Но, и тоа ќе заврши и после тоа ќе треба да се соочат со институтот одговорност. Е сега јас велам колку побргу тоа се случи, толку помал срамот за нив ќе биде. Затоа, отворен е патот за брзи предвремени парламентарни избори – повтори Мицкоски.
