Повеќето пациенти се задоволни од лекарите кои работат во јавниот здравствен сектор, 60-70% од граѓаните се задоволни од лекарските услуги, рече министерот за здравство, Арбен Таравари, на прес-конференција по повод 100 дена Влада.
– За жал, новинарите не прават вести од тие пациенти што се задоволни од лекарот, но, сепак, околу 20-30% не се задоволни, има разно-разни забелешки, некои оправдани, а некои неоправдани. Некој чека 5 минути и е нервозен, па и ние во банка понекогаш чекаме 10 минути, па не викаме – објасни министерот за здравство.
Сепак, вели тој, некои пациенти се жалат со право.
– Но, некои пациенти се жалат со право. Некогаш сме комуницирале со лекарите од кои се жалеле, сепак здравствениот систем постои заради пациентите. Но, ние треба да ги мотивираме и здравствените работници, да ги пофалиме, а не само да ги критикуваме. Ако од ист колега се жалат повеќе пациенти, ќе ги преземеме мерките кои може да ги преземе Министерството за здравство – додаде министерот.
Таравари говореше и за долгите листи на чекање за хируршки операции кои дополнително се влошени поради проблемот со компресорската станица на клиничкиот центар „Мајка Тереза“.
– Еден закон е поминат пред изборите, а тој дозволува кој каде сака да работи. Не сум против тоа лекарите да работат дополнително, ама во јавните здравствени установи, а не во приватните. Ќе инсистирам кој сака да може да работи дополнително, и хирурзи и интернисти да работат за да не чекаат пациентите… Хирурзите можат да оперираат и за викенд. Но, компресорските станици си го направија своето – изјави министерот за здравство.
Тој најави дека лекарите специјалисти од приватните здравствени установи ќе можат да се вработат во државните здравствени установи.
– Од август 2022 година имаше забрана (за лекарите) да не можат од приватни болници да се вработат во државни. Пред 3 недели го поништивме ова. Сега подготвуваме правилник во Министерството… Јас разговарав со 10 такви лекари, тоа се кадри што гледаат надеж во јавното здравство. Ова е добар чекор, се надевам дека идната година ќе продолжиме со такви доктори кои покажуваат интерес да се вратат во јавното здравство – изјави министерот.
