„Богохулие е отровот што го пушташ и со кој навредуваш и понижуваш 51 отсто од популацијата. Не си ги разбрал поимите, но и времето во кое живееме. Не е време на инквизиција, владико. Живееме во демократија“ – му порача на Владиката Петар министерката за труд и социјална политика Јована Тренчевска вчера во објава на својот личен профил на Фејсбук.
Владиката Петар, митрополит Преспанско-пелагониски, во Велигденското послание жестоко го нападна феминизмот и рече дека родовата еднаквост е изопачена. Тој смета дека пред појавата на ова движење жените биле домаќинки, а сега се еманципирани, но се се почесто разведени.
– На нашето општество молскавично му се заканува уште поопасна, попогубна и поотровна идеологија – родовата еднаквост! Оваа идеологија, односно манипулативна терминологија е богохулна, противприродна, изопачена, Господ ги создаде машко и женско и сè друго изменето, поинакво и поразлично од божјото создание, е ненормално, а со тоа и неприфатливо – рече митрополитот Преспанско-пелагониски.
Овие ставови на владиката Петар предизвикаа лавина реакции на социјалните мрежи, а меѓудругите и од министерката за труд и социјална политика Тренчевска.
„Жената не бара повеќе права, бара исти права и исти можности како и мажите. Ама Владико тоа ти со твоите ретроградни ставови, со понижувањата и омаловажувањата кон жената не можеш да го разбереш. Богохулие е отровот што го пушташ и со кој навредуваш и понижуваш 51% од популацијата. Не си ги разбрал поимите, но и времето во кое живееме. Не е време на инквизиција, Владико. Живееме во демократија. Во време кога можеби не секоја жена е гласна, храбра, но оние гласните и храбри се борат за родова еднаквост. За своите права и правата на секоја друга жена. За правата на секој поединец во општеството“ – напиша министерката Тренчевска.
Од МПЦ-ОА одбија да ги коментираат или да се оградат од ставовите на владиката петар со оценка дека тоа е негови приватни ставови.
