Минатата година Европската канцеларија за борба против измами (ОЛАФ) препорача враќање на 426,8 милиони евра во буџетот на ЕУ, спречи неоправдано трошење на 197,9 милиони евра, склучи 256 истраги и издаде 275 препораки до надлежните органи на земјите членки и ЕУ, пишува Јутарњи лист во четврток .
Според работниот извештај за 2022 година, експертите на ОЛАФ спроведоа 1.017 прелиминарни анализи, отворија 192 нови истраги и пријавија 71 случај на потенцијални кривични дела до Канцеларијата на европското јавно обвинителство (ЕПО), од кои 16 во име на Европската комисија.
Генералниот директор на ОЛАФ, Вил Итала, се пофали со успехот во заштитата на парите на даночните обврзници на ЕУ наменети за инфраструктура и дигитализација, заплената на 531 милион нелегално тргувани цигари, меѓународната акција против лажниот мед и враќањето на речиси три милијарди евра на Буџетот на ЕУ од случајот со потценување на царинската вредност.
Борбата против фалсификувањето и шверцот останува во срцето на операциите на ОЛАФ. Минатата година тој коорганизираше или даде поддршка во неколку заеднички царински операции и учествуваше во помагањето за запленување на милиони фалсификувани и опасни предмети пред да бидат употребени. Станува збор за лажни лекови, фалсификувани и потенцијално опасни играчки, нелегално тргувани цигари, па дури и 14,7 милиони литри нелегално произведено вино, пиво и силни алкохолни пијалоци.
Исто така, се посочува дека ОЛАФ долго време соработува со украинските власти и на расходната страна (заштита на фондовите на ЕУ) и на приходната страна на буџетот на ЕУ (царинска соработка). „Од почетокот на војната, ОЛАФ им дава помош на агенциите за борба против измами во Украина за да помогне во зајакнувањето и подобрувањето на структурите во земјата за борба против измамите и корупцијата и за заштита на постојното и идно финансирање од ЕУ“, се вели во извештајот, нагласувајќи дека ОЛАФ игра важна улога и во борбата против избегнувањето на санкциите што ЕУ ги воведе кон Русија и Белорусија по инвазијата на Украина.
ОЛАФ се занимава и со персоналот и членовите на институциите на ЕУ за правилно користење на европските фондови, а минатата година склучи 38 истраги за измамничко или несоодветно однесување на персоналот, пишува новинарката на Јутарњи лист, Иванка Тома.
