Украинските командоси, наводно, го нападнале Крим со скутери на вода и моторни чамци во ноќниот напад на полуостровот.
Снимката снимена со дрон покажува флота од бродови кои се движат низ Црното Море кон Крим од пристанишниот град Вилково. Медиумите наведуваат дека видеото е снимено на крајот од патот долг 350 километри по кој наводно среде ноќ го поминале 16 припадници на украинските специјални сили.
Андриј Јусов, портпарол на воената разузнавачка служба на Киев, изјави дека по пристигнувањето имало жестоки борби и дека има многу мртви и ранети на руска страна, но признал и дека украинските сили претрпеле големи загуби.
– За жал, има загуби кај украинските специјалци, кои сѐ уште не се споредливи со руските. Специјалната операција за деокупација на Крим продолжува. Апелираме до сите жители на полуостровот да почекаат и на секој можен начин да им помогнат на одбранбените сили во враќањето на украинските територии – вели Јусов.
Руските медиуми објавија дека за време на борбите загинале 13 Украинци.
– Нема повредени или загинати меѓу припадниците на граничната служба – се наведува во извештајот на руските медиуми во кои се наведува и дека против Украинците биле користени воени авиони.
Портпаролот на ФСБ изјави дека успеале да го фатат украинскиот војник Александар Љубос (46).
Тој беше снимен со рацете врзани зад грб и рече дека е приватен војник од единицата 0336 на Главната управа за разузнавачка одбрана на Украина. За време на испрашувањето, тој наводно рекол дека целта на мисијата била да се постави украинското знаме на Крим.
Снимката доаѓа неколку дена откако Украина испрати претходна мисија на скутери на вода на Крим. Тоа е првпат украинските војници да стапнат на полуостровот од 2014 година.
Десет скутери на вода беа искористени за транспорт на 20 украински „жаби“ на патување од 425 километри низ Црното Море во двата правци.
За време на мисијата, која беше организирана на крајот на август, но за која првпат јавно се зборуваше пред само неколку дена, наводно дошло до конфликт пред контролниот центар на Крим. Борбата наводно траела околу 30 минути, по што била дадена наредба за повлекување, а сите 20 „жаби“ се качиле на скутерите на вода и четири часа биле бркани од руски авиони.
