Во Јужен Велс е прогласена вонредна состојба по силните поплави, додека поголемиот дел од Англија е ставен во состојба на тревога поради студено време.
Вонредната состојба е прогласена откако Противпожарната и спасувачка служба на Јужен Велс во Монмут спроведе операции за спасување, евакуација и проверки на состојбата на жителите, објавува Скај њуз.
Шефот на противпожарната служба Мет Џонс изјави дека екипите работеле неуморно преку ноќ и ден за да им помогнат на погодените и ја повика јавноста да ја избегнува областа Монмут.
Природни ресурси Велс издаде четири сериозни предупредувања за поплави по должината на реките Мону и Вај во близина на Монмут, додека Советот на округот Монмутшир ги повика жителите да избегнуваат патувања поради лошите услови на патиштата.
Повеќе од сто предупредувања за поплави беа издадени низ цела Велика Британија, бидејќи бурата Клаудија донесе поројни дождови, а се очекува во некои области да паднат месечно во просек во рок од 24 часа.
Агенцијата за безбедност на здравјето на Велика Британија (UKHSA) издаде жолто предупредување за студено време за пет региони на Англија, од Источен Мидлендс до Јоркшир и Хамбер, од понеделник до петок, предупредувајќи за можни значајни здравствени ефекти, вклучително и зголемен ризик за постарите лица и лицата со здравствени проблеми.
Метеоролошката служба предвиде дека температурите би можеле да паднат под нулата следната недела, додека железничките оператори во Англија и Велс пријавија прекини или откажувања поради поплави на пругите.
Во некои области на Велс се очекуваат од 30 до 100 милиметри дожд, што би можело да доведе до понатамошни излевања на површинските води и реките.
