Eкс-директорот на УБК Сашо Мијалков денеска попладне од затворот во Струга беше спроведен на судско рочиште во Кривичниот суд Скопје за случајот „Титаник 2“, откако не се појави на претходното рочиште поради грешка на Кривичниот суд.
Мијалков беше придружуван со затворска полиција. На рочиштето неговите застапници немаа прашања за сведоците, поранешните членови во Државната изборна комисија Виолета Дума, Борис Кондарко и Субхи Јакупи, кои по третпат одговараат на прашања во овој предмет.
Во делото „Титаник 2“ Мијалков доби првостепена пресуда за затворска казна од 3 години. Овој предмет беше вратен од Апелација во декември 2019 година. За Мијалков делото може да застари ако до април 2023 година не заврши во прв степен пред Кривичниот суд, но и со правосилна пресуда од Апелација. Одбраната не ја коментираше можноста за застарување на делото.
Покрај „Титаник“, апелација овој месец ги врати во првостепена постапка и пресудите „Трезор“ и „Таргет-Тврдина“.
