Поранешниот руски претседател Дмитриј Медведев на социјалните мрежи во неделата објави божикна честитка во која ја критикуваше Европа нарекувајќи ја „целосно болна“.
„Постојано висока инфлација и отсуство на економски раст, целосно бојкотирање на снабдувањето со енергија од Русија и нејзиниот пазар, толпи Украинци кои безделничат и шетаат по улиците на Европа, со надоместоци повисоки од пензии од оние на Европејците, дегенерирани политичари кои врескаат за војна меѓу Украина и Русија до победа… Европа, здраво! Што не е во ред со тебе, дали си целосно болна? Среќен Божиќ!“, напиша Медведев на Икс.
Коментарот на Медведев доаѓа само неколку дена откако Советот на ЕУ го одобри 12-тиот пакет санкции за Русија. Во последователен пост Медведев наведе напис на БНН за инфлацијата во Германија, но и на Би-Би-Си каде се вели дека иако инфлацијата во Велика Британија опаѓа, сегашните 3,9 отсто се речиси дупло од 2 отсто на кои цели централната банка во земјата.
Многу од коментарите на постот на Медведев се согласуваа со неговото мислење. „Европа е континент против себе“, напиша еден корисник.
Но, друг напиша, „Сѐ оди според планот – а, Дими?“, мислејќи на новите санкции на ЕУ за кои се зборува дека посериозно ќе ја погодат руската економија.
Медведев исто така изјави дека безбедносните гаранции кои земјите на Г7 ѝ ги дале во јули на Украина се бескорисни, а дека можат да го отворат патот за воена база на НАТО во земјата, што може да предизвика директен судир со Москва.
Во исто време, тој сугерираше дека декларацијата е бескорисно парче хартија кое „нема никаква додадена вредност“.
– Ова е само јавна изјава, која значи дека тоа е бескорисно парче хартија – рече тој.
Ова би можело да го отвори патот за конфликт од големи размери во кој ќе бидат вклучени земја на НАТО и Москва, смета Медведев.
– Кога Русија ќе нападне таква база – и тоа неизбежно ќе се случи бидејќи воениот персонал од базата дојде специјално да се бори против нас – дали земјите од Алијансата ќе бидат подготвени за колективен одговор? – прашува тој.
