Три американски и британски авиокомпании ги откажаа летовите за Израел во средата како одговор на ескалацијата на безбедносните тензии додека Тел Авив се подготвува за можна одмазда од страна на либанската група Хезболах по атентатот на еден од клучните воени лидери на групата во Бејрут.
Израелското воено радио објави дека американските „Јунајтед ерлајнс“ и „Делта ер лајнс“ се решиле на ваков чекор по убиството на високиот командант на Хезболах, Фуад Шукр во вторникот.
Израелскиот дневен весник „Једиот Ахронот“ објави дека „Бритиш ервејс“ објавил прекин на летовите за Израел.
„Јунајтед ерлајнс“, која оперира 14 летови неделно до Тел Авив, ги информираше патниците за откажување на летовите во наредните денови“, пишува весникот, додавајќи дека „Делта“ ги откажа летовите во средата и четвртокот од Њујорк.
За „Бритиш ервејс“ не е познато дали летовите биле прекинати на 24 или 48 часа.
Austrian Airlines и German Lufthansa во понеделникот ги прекинаа летовите до и од аеродромот Бен Гурион во Тел Авив.
Во април, Израел го затвори својот воздушен простор на седум часа поради напад со беспилотни летала и ракети од Иран, што беше одмазда за израелскиот воздушен напад врз амбасадата на Техеран во Дамаск. Во нападот загинаа 16 лица, меѓу кои и висок офицер на иранските сили Кудс.
Тензиите во Израел се зголемија откако Тел Авив го изврши атентатот на Шукр (63) во воздушен напад врз зграда во јужен Бејрут во вторникот вечерта. Хезболах го потврди убиството на Шукр во средата навечер.
Палестинската група на отпорот Хамас вчера објави дека Тел Авив го убил шефот на политичкото биро на групата Исмаил Ханије во израелски воздушен напад врз неговата резиденција во Техеран.
Стравувањата од целосна војна меѓу Израел и Хезболах се зголемија по неколкумесечни прекугранични престрелки.
Ескалацијата доаѓа во позадина на израелските напади врз Газа во кои загинаа повеќе од 39.400 луѓе од октомври по нападот на Хамас.
