Една недела по преземањето на функцијата, новиот министер за здравство Фатмир Меџити ги соопшти приоритетите на кои ќе работи во наредниот перид.
И тој, како и сите негови досегашни претходници-министри, ветува дека прво што ќе направи ќе биде да најде решение за хаосот од возила во Клинички центар. Втор приоритет му е ажурирање на позитивната листа на лекови која не е обновена повеќе од 10 години. Трето, во програмата Меџити има зголемување на платите на здравствените работници, а како многу важен проект Меџити го наведе и новиот клинички центар и регионализација на болниците за што вели дека има детални проекти.
– Наш прв приоритет ќе биде да го решиме сообраќајниот хаос во Клинички центар. Се консултираме со сите институции, засегнати страни и размислуваме тоа да го решиме во најбрз можен рок. Како второ, ќе ја ажурираме промената на позитивната листа, и како трето и многу важно, ќе ги зголемиме платите на здравствените работници. Многу е битно ние да можеме да отвориме нов ургентен центар, интернистички тријажен центар. Другото прашање кое долго време се поставува во државата и е од голема итност, е да го продолжиме проектот за нов клинички центар и да направиме регионализација на болниците во државата. И за регионализацијата и за клиничкиот центар имаме детален проект како ќе се одвиваат работите – најави министерот Меџити.Тој најави и дека наскоро ќе бидат сменети 6 директори на клиники:
– Клиниката за неврологија, клиника за дерматовенерологија, клиниката за ендокринологија и клиниката за очни болести ќе добијат нови директори, а нови организациски директори ќе добијат и клиниката за онколошки болести и клиниката за гинекологија и акушерство – соопшти денеска министерот за здравство.
Смената на директорите, како што истакна Меџити, е според договорот за влез на Алијансата за Албанците во владината коалиција.
