Сите 66 директори на универзитетските клиники во Клиничкиот центар во Скопје треба да се разрешат и треба да се укине и Службата за заеднички работи која во изминатиот период ништо не работи освен што од година во година ги зголемува долговите – рече министерот за здравство Фатмир Меџити на денешната седница на Анкетната комисија за случајот со Клиниката за онкологија во македонското Собрание.
– Јас сум за тоа дека треба да се тргнат овие директори и сите тие јавни набавки да бидат на ниво на еден заеднички клинички центар, а не со Заеднички служби кои ништо не работат, не ги знаат одговорностите, само од година во година ги зголемуваат долговите. Затоа ова е конкретна јасна мерка и во иднина ќе видите дека ова ќе биде реалност и како ќе се справиме со сите овие нерегуларности – рече министерот Меџити.
Тој рече дека македонскиот клинички центар треба да се реформира по урнек на Клиничкиот центар во Љубљана.
