Милијардерот Илон Маск за момент ја загуби титулата најбогат човек на светот во средата, откако акциите во автомобилскиот производител Тесла паднаа. Неколку часа на листата на Форбс го претекна Французинот Бернар Арно. Заедно со семејството тој е сопственик на компанијата LVMH, која произведува и продава луксузна стока, пренесува француската новинска агенција АФП.
Набргу по падот на второто место, Илон Маск повторно се искачи на врвот на листата со имот проценет на 184,9 милијарди долари, додека семејството Арно падна на второто место со 184,7 милијарди долари.
Освен „Тесла“, Маск ја води вселенската компанија „Спејс Икс“, а во последните месеци најголема врева направи неговото преземање на социјалната мрежа Твитер, чија судбина е доведена во прашање.
Компанијата на Арно под себе има многу луксузни брендови, како Луј Витон, Живанши и Кензо.
На третото место на листата на најбогати луѓе на Земјата, подготвена од американскиот бизнис магазин Форбс, е индискиот пристанишен магнат Гаутам Адани со имот проценет на 134,8 милијарди долари, а по него се основачот на Amazon и вселенската компанија Blue Origin Џеф. Безос, кој тежи 111,3 милијарди долари.
