Францускиот претседател Емануел Макрон денеска беше инаугуриран во Париз на почетокот на неговиот втор мандат, а за време на својот говор вети дека ќе изгради „посилна Франција“.
Вториот мандат на Макрон официјално ќе започне на 14 мај.
Макрон започнува уште еден петгодишен мандат, кој, според АФП, ќе биде исполнет со меѓународни и домашни предизвици.
Во својот говор Макрон вети дека првично ќе преземе чекори за да се избегне каква било понатамошна ескалација на руската војна во Украина пред да продолжи да се фокусира на промовирање на Франција и Европа во светот.
Макрон, исто така, вети дека ќе најде „фер метод“ за управување со земјата и за ублажување на социјалните тензии со тоа што ќе ги принуди владата и парламентот да работат заедно со синдикатите, здруженијата и другите претставници од политичкиот, економскиот, социјалниот и културниот свет.
На церемонијата на инаугурацијата, Макрон одржа пократок говор од вообичаеното и поголемиот дел од времето го поминуваше индивидуално поздравувајќи ги присутните.
На церемонијата присуствуваа околу 500 гости. Најмногу од гостите беа од светот на политиката, иако меѓу нив имаше актери, здравствени работници, воени офицери како и поранешни претседатели Франсоа Оланд и Никола Саркози.
На 24 април, во вториот круг, Макрон беше реизбран за шеф на француската држава во следните пет години, а ја победи екстремно десничарската ривалка Марин Ле Пен.
