Македонската кикбоксерка Јадранка Темелкова ја победи Николе Булјан од Хрватска со што обезбеди најмалку бронза на Светското јуниорско првенство во кик бокс во Лидо ди Јесело, Италија.
Темелкова славеше 3-0, со што го обезбеди првиот медал за Македонија на СП. Утре ќе се бори за влез во финалето против Канита Муминовиќ од Босна и Херцеговина.
Од нашиот табор велат дека противничката во сите три рунди не земала ниту еден поен, така што Јадранка убедливо доминирала.
– Темелкова е голема надеж во кикбоксот. Јуниорка која многу ветува. Се бори смирено и паметно. Таа е пример за сите наши борци како се слуша тренер за време на борба од агол, кога и довикува што да изработи. Слуша се што ќе и се каже – вели селекторот Дејан Митровски – Урко.
