Стојан Спасов, 25-годишен македонски државјанин, е пронајден мртов во саботата пред шопинг мол во Софија, објавија негови пријатели на социјалните мрежи, повеќето од нив спортисти кои се занимаваат со боречки вештини, во кои спаѓал и Спасов.
Според нив, Спасов бил спортист од Виница, кој веќе неколку месеци живеел во Софија.
Веста за смртта на Спасов не била објавена во бугарските медиуми, туку преку социјалната мрежа Инстаграм, од каде дознале и неговите пријатели и роднини.
Според некои од нив, станува збор за убиство, но тоа се премолчува. Во нивниот пријател наводно било пукано со огнено оружје. Официјално, телото е предадено на обдукција и не се знаат причините за смртта.
Неговите пријатели сметаат дека за смртта на Спасов не се известени медиумите во Македонија.
„Апелирам до медиумите да ја објават веста за неговата смрт. Истовремено апелирам до македонската полиција и до македонските служби да помогнат во обдукцијата, да се дознае вистинската причина за смртта и да помогнат за враќање на телото во нашата држава“ – напиша на Фејсбук Бобанчо Боби Илиевски, еден од пријателите на Спасов.
