Победата на опозициската Републиканска народна партија на локалните избори во Истанбул предизвика голема еуфорија. Илјадници луѓе излегоа на улица, веејќи турски знамиња и славејќи го поразот на Партија на правдата и развојот (АК) на актуелниот турски претседател Реџеп Таип Ердоган.
На прославата во населбата Бајрампаша во Истанбул во еден момент од звучниците одекна популарната песна „Јутро је“ од српската пејачка Нада Топчагиќ, а толпата гласно пееше и играше.
Екрем Имамоглу, актуелниот градоначалник на Истанбул и кандидат на најголемата турска опозициска партија, Републиканската народна партија (ЦХП), синоќа прогласи победа на изборите за градоначалник во најголемиот турски град.
Имамоглу рече дека води на локалните избори во Истанбул со повеќе од милион гласови за поддршка по преброените 96% од гласачките ливчиња, пренесе Ројтерс.
Тој претходно изјави дека врз основа на податоците што ги собрале може да каже дека граѓаните навистина покажале наклонетост и доверба кон нив и додаде дека се многу задоволни од моменталната слика.
Претходно, актуелниот градоначалник на Анкара, исто така кандидат за ЦХП, Мансур Јавас, прогласи победа на изборите само три часа по затворањето на избирачките места врз основа на првичните резултати, кои покажаа дека тој води пред својот ривал од владејачката АКП со речиси 20%.
Турската опозициска Републиканска народна партија (ЦХП) освои 37,32% од гласовите на локалните избори во Турција, додека владејачката Партија на правдата и развојот (АК) на претседателот Реџеп Таип Ердоган освои 35,78% од гласовите, според неофицијалните резултати врз основа на 90% од пребројаните гласови, пренесува Анадолија.
Агенцијата наведува дека за прв пат во последните 35 години ЦХП е во водство по бројот на гласови и прогласи победа на изборите за градоначалник на Анкара и Истанбул.
Некои извештаи покажуваат дека ЦХП води и во други големи градови како Измир, Бурса, Анталија и Адана.
Турскиот претседател Реџеп Ердоган изјави дека локалните избори не се крај, туку пресвртница.
– Локалните избори на 31 март завршија на начин достоен за нашата демократија. Немаше инциденти кои би фрлиле сенка на изборната атмосфера. Турската демократија уште еднаш ја докажа својата зрелост – рече Ердоган пред поддржувачите во Анкара, додавајќи дека волјата на нацијата се манифестира на гласачките ливчиња и дека нацијата ја пренесе својата порака до политичарите.
Тој оцени дека победник на изборите се „демократијата и националната волја“.
Водачот на ЦХП, Озгур Озел, рече дека исходот од изборите „нема да биде пораз за никого“.
– Во оваа победа нема губитници. Нашиот успех не е пораз за никого, ниту пак ќе биде пораз за никого – рече Озел.
Турските граѓани вчера избраа градоначалници и други локални функционери кои ќе ја извршуваат функцијата во следните пет години.
