Лидерите на Групата седум најбогати демократии (Г7) денеска ќе започнат тридневен самит во германскиот град Елмау, на Баварските Алпи, со цел да се зголеми притисокот врз Русија, чии акции во Украина создадоа недостиг на храна и енергија во светот, пишува Нова. „Ќе има ли единство во Г7?“, прашува Би-Би-Си.
Франција, Германија и Италија, на пример, неформално прашаа дали можеби не е подобро војната да заврши, дури и по цена Украина да отстапи територија. Една неодамнешна анкета на јавното мислење низ Европа сугерираше дека некои гласачи го ставаат решавањето на кризата со трошоците на животот пред казнувањето на Русија.
Други се расправаат за потребата да се спаси некој вид на односи со Русија во иднина.
Земјите како Обединетото Кралство, Полска и трите балтички земји се спротивставија на овие аргументи, велејќи дека секој мировен договор со Москва што не е според условите на Украина ќе доведе до натамошна руска агресија во иднина. Претседателот Зеленски најверојатно ќе го зајакне овој аргумент кога ќе се обрати на самитот во понеделник.
Санкциите за руските енергенси имаа непожелен ефект – зголемување на цените на енергијата, што доведе до тоа Русија да заработи повеќе од извозот, и покрај падот на нејзината економија.
На самитот ќе присуствуваат лидерите на САД, Германија, Франција, Велика Британија, Италија, Канада и Јапонија.
По повод самитот вчера во Минхен се одржаа протести против глобализмот, спонзорирани од повеќе од 15 организации, меѓу кои WWF Германија, Оксфам, Гринпис и Леб за светот.
Демонстрантите повикаа да се стави крај на зависноста од руските фосилни горива, побараа од Г7 да одвои повеќе ресурси за спречување на кризи, управување со граѓански конфликти, економски развој, заштита на животната средина и за зачувување на разновидноста на животните и растенијата. Демонстрантите очекуваат Г7 да преземе мерки против сиромаштијата и климатските промени и гладот во светот, објави претходно Ројтерс.
Германската министерка за внатрешни работи Ненси Фезер ги повика демонстрантите да се воздржат од насилство, а околу местото на протестот и самитот на Г7 беа распоредени околу 18.000 полицајци.
