Лего го стопираше проектот за правење блокови од рециклирани шишиња со образложение дека новиот материјал ќе предизвика уште поголеми емисии на јаглерод, објави лондонскиот деловен весник The Financial Times.
Данската компанија во 2021 година објави дека истражува дали може да произведе коцки од ПЕТ пластика (полиетилен терефталат), чиј квалитет не се намалува со рециклирање.
Рециклирана пластика требаше да го замени акрилонитрил бутадиен стирен (ABS) на база на масло.
Истражувањата покажаа дека ПЕТ пластиката би предизвикала поголеми емисии на јаглерод до крајот на рокот на траење на производот, бидејќи ќе бара нова опрема, посочија тие пред ФТ.
Во ПЕТ пластиката треба да се додадат состојки за да биде безбедна и издржлива, но исто така бараат големи количини енергија за обработка и сушење, објасни Тим Брукс, шеф на одделот за одржливост на Лего Групацијата.
„Можете да го споредите со обидот да направите велосипед од дрво наместо од челик“, додаде Брукс.
Извршниот директор Нилс Кристијансен изјави за Фајненшл Тајмс дека се надева дека ќе открие „магичен материјал“ кој ќе ги реши проблемите со одржливоста.
„Тестиравме стотици и стотици материјали, но едноставно не го најдовме“, нагласи Кристијансен.
Компанијата ќе се фокусира на подобрување на јаглеродниот отпечаток на ABS, велат тие.
