Јавното претпријатие Лајка почна кампања за вдомување на 15 питбули кои ги има во прифатилиштето.
„Не дискриминирај, биди кул! Вдоми љубов, вдоми питбул!“ е мотото под кое Лајка се обидува да им најде нов дом на овие кучиња.
– Во нашето прифатилиште има 15 питбули кои бараат дом и интересот за нивно вдомување е многу мал. Некои од нив се многу долго со нас, па затоа одлучивме да ја започнеме оваа кампања за сузбивање на предрасудите кон овие кучиња и конечно сите да го најдат својот дом и сопственик – велат од Лајка.
Кампањата е насочена и кон тоа да се подигне свеста во Македонија за оваа раса и дека овие кучиња се одлични домашни миленици кои се премногу лојални, привразни со семејствата, особено со децата.
– Целта на оваа кампања е да ја покренемe свеста за овие раси, кои поради луѓето кои ги злоупотребуваат се здобиле со лоша репутација и се надеваме дека ќе поттикнеме повеќе луѓе да ги вдомат и чуваат соодветно, како што заслужуваат. Нивниот „страшен“ изглед не ги прави страшни и лоши кучиња, напротив тие можат да бидат прекрасни миленици и најдобри пријатели – велат од Лајка.
