Украинскиот министер за надворешни работи, Дмитро Кулеба, на средбата со својот македонски колега Бујар Османи посочи дека Русија не само што ја мрази соседната држава Украина, туку го уништува украинскиот идентитет, јазик и Украина.
– Македонците веројатно, како никој друг во Европа, разбираат што значи да се биде понижен за својот идентитет, јазик, култура. Токму тоа го доживуваме во моментов. Русија не само што ја мрази соседната држава Украина, туку го уништува украинскиот идентитет, јазик и Украина – рече тој.
На средбата со Османи во Киев, Кулеба изрази надеж дека Парламентот на Македонија ќе ги признае руските злосторства во Украина како геноцид.
– Сакам да изразам надеж дека Парламентот на Северна Македонија ќе донесе одлука за признавање на руските злосторства во Украина како геноцид врз украинскиот народ – рече Кулеба.
Министерот додаде дека Османи утрово го посетил Ирпен, „ослободен од руските освојувачи“ и со свои очи видел што се случува таму.
Покрај Украина, парламентите на Естонија, Летонија, Литванија, Чешка, Полска и Канада ги означија акциите на Русија во Украина како геноцид.
Од денеска македонската амбасада во Киев повторно функционира.
