Украинскиот министер за надворешни работи Дмитро Кулеба изјави дека не очекува Киев да добие борбени авиони „во скоро време“ поради логистички и технички тешкотии, пренесува Анадолија.
– Не очекувам испораката на борбени авиони да се случи во скоро време бидејќи тоа е многу тешка задача, логистички и технички. Затоа, советуваме обуката на украинските пилоти на западните авиони да започне веднаш, за кога ќе се донесе одлука за обезбедување авиони, да не губиме време или многу месеци на обука – изјави Кулеба во интервју за германскиот весник „Билд“.
Тој ја повтори потребата на Украина од повеќе оружје и муниција, велејќи дека Германија може да помогне во барањата на Киев, но дека има проблеми поврзани со нивната набавка на владино ниво.
– Мислам дека Германија навистина може да помогне повеќе со муниција. Со артилериска муниција – рече Кулеба.
Откако ја обезбеди испораката на борбени тенкови во јануари, украинскиот претседател Володимир Зеленски побара од Западот борбени авиони за одбрана од руските напади, што досега беше официјално отфрлено од земји како САД и Германија.
На прашањето што би се променило доколку Киев се повлече од градот Бахмут во источниот регион на Украина Доњецк, Кулеба рече дека Русија ќе ја продолжи офанзивата во правец на Часив Јар, што може да доведе до „слична судбина“ за населбите по Бахмут.
– Кога некој ќе ви упадне во куќата, не се прашувате колку долго можете да му се спротивставите на ликот што упадна во вашата куќа и се обидува да ве убие вас и вашето семејство и да ограби сè во куќата, нели? Размислувате што друго можете. да направите за да го исфрлите од дома, и да се натера полицијата да го уапси – рече Кулеба.
Бахмут е главен транспортен центар преку кој украинските војници во Донбас се снабдуваат со оружје, воена опрема и муниција. Во регионот веќе девет месеци се водат тешки битки.
Ситуацијата околу Бахмут останува сложена, но украинските сили ги спречуваат руските обиди да го заземат градот, изјави денеска командантот на украинските копнени сили, генерал-полковник Олександр Сирски.
„Ситуацијата околу Бахмут останува сложена“, напиша Сирски на апликацијата Телеграм на украинскиот медиумски воен центар.
„Сите обиди да се заземе градот се одбиени со артилериски оган, тенкови и друга огнена моќ“, додаде тој.
Борците на приватната руска воена компанија „Вагнер“ „напаѓаат од различни страни, се обидуваат да ја пробијат нашата одбрана и да напредуваат кон централните области на градот“, додаде Сирски.
фото: МИА
