„Србија веќе одлучи да се сврти кон Западот и мислам дека е фрустрирачки за многу Срби што процесот трае толку долго. Се надевам дека резултатот од сето ова ќе биде многу подобро, побрзо темпо (на европската интеграција)“.
Вака изјави американскиот амбасадор во Србија, Кристофер Хил, во интервју за „Иза Вести“ на Н1. На прашањето зошто европскиот предлог е таен, тој рече дека нема да го нарече тајна, туку нешто што спаѓа во традиционалните дипломатски канали.
– Доколку се обидете да се справите со дипломатијата преку медиумите, ќе се појават многу недоразбирања – рече тој и додека дека затоа смета дека за таквите работи треба да се разговара исклучиво на маса.
Тој, исто така, рече дека Србија се држи до својата политика кон санкциите против Русија подолго отколку што руската армија се држи до Херсон.
– Прашањето за односите на Србија со Русија, можете да видите дека од ден на ден слабее. Се гледа дека има сè поголем интерес за соработка со ЕУ и поголем интерес за соработка со нас – рече Хил.
На прашањето кој повеќе соработува, косовскиот премиер Албин Курти или српскиот претседател Александар Вучиќ, амбасадорот се насмеа.
– Да мислев дека одговорот на тоа прашање ќе помогне во преговарачкиот процес, би одговорил, но тоа ќе го оставам на вашата имагинација – рече тој.
Тој посочи и дека главното прашање за исполнување на Бриселскиот договор е формирањето на Заедницата на српските општини.
– Мислам дека има итна потреба сите да се согласат за тоа и да разберат дека штом ќе се посветите на нешто, треба да продолжите – рече Хил.
Во меѓувреме, министерот за надворешни работи на Србија, Ивица Дачиќ, изјави дека разговорите што ги водел во Вашингтон пред денешниот молитвен појадок биле успешни за Србија, дека од Стејт департментот стигнала уште една потврда дека постапките на претседателот Александар Вучиќ се исправни и дека „ги штитиме националните и државните интереси за да не ја загрозиме нашата сопствена иднина“.
Дачиќ ги повика сите партии во Србија на единство во врска со прашањето за Косово.
– САД искрено го поддржуваат ставот дека Заедницата на српските општини(ЗСО) е нешто што е претходно договорено и не е предмет на дискусија, дека таа мора да се формира за да се разговара понатаму и потоа да се продолжи со имплементација на договорот – изјавил Дачиќ за агенцијата Танјуг во Вашингтон.
