Прашање е дали САД можат да сметаат на косовскиот премиер Аљбин Курти како партнер, изјави американскиот амбасадор во Белград Кристофер Хил. Тој додаде дека „не памети толку длабоки поделби меѓу Приштина и Вашингтон“.
Хил во интервју за Гласот на Америка рече дека Србија е конструктивен партнер во процесот на актуелната криза во Косово, но дека се очекува да ги признае косовските документи и да не ја спречи Приштина да се приклучи на меѓународните организации.
Американскиот дипломат ги негираше наводите на некои провладини медиуми дека Западот сака да ја дестабилизира Србија преку протести против насилството.
Американскиот заменик-помошник државен секретар Габриел Ескобар и специјалниот пратеник на ЕУ за дијалог Мирослав Лајчак на Белград и Приштина им презентираа предлози – за деескалација, нови избори на кои ќе учествуваат и Србите и враќање на дијалогот за нормализација.
Американскиот заменик-помошник државен секретар Габриел Ескобар и специјалниот пратеник на ЕУ за дијалог Мирослав Лајчак на Белград и Приштина им презентираа предлози – за деескалација, нови избори на кои ќе учествуваат и Србите и враќање на дијалогот за нормализација. На прашањето за тие предлози, Хил вели:
„Мислам дека имаме проблем со господинот Курти, тој не е подготвен да го прифати. Ми се чини дека имаме многу суштински проблеми со него, дали можеме да сметаме на него како партнер. Но, таа одлука ќе ја препуштам на нашата амбасада во Приштина“.
Американскиот амбасадор рече и дека деескалацијата на кризата е „суштинска“.
„И мислам дека имавме одреден успех по тоа прашање во изминатите неколку дена. Има деескалација, секако на српска страна, а очекувањата од ЕУ и САД се Косово да направи чекор во таа насока. Многу е важно специјалната полиција да се повлече од општинските згради. Исто така, градоначалниците треба да ги напуштат општинските згради и тоа треба да се случи во одреден момент. И третото, малку потешко прашање е – може ли да имате нови избори. Од српска страна јасно беше кажано дека е важно формирањето на Заедницата на српските општини (ЗСО), што се уште е проблем за господинот Курти. Затоа што сите други разбираат дека тоа е неопходно“, изјави Хил.
Србите, додава тој, се загрижени поради „учеството на локалните избори кои се одржуваат под исти околности како и претходните – кои тие ги бојкотираа“.
„Мислам дека се потребни некои промени, не сакам да зборувам до каде треба да одат и како ќе се постигнат. Знам дека ќе има многу дискусии со српската заедница во Косово за тоа како да се оди напред. Мораме да имаме на ум дека целта на овие избори е оние кои се избрани да и служат на заедницата на северот на Косово, која е претежно српска“, рече тој.
Кои се последиците?
За тоа какви ќе бидат последиците за двете страни доколку не ги исполнат барањата, Хил го спомена откажувањето на воената вежба со Косово и изјави дека тоа е „процес“.
„Морам да кажам, и се извинувам за изразот, дека тоа е процес. И тоа нема да се случи во еден момент, туку во одреден временски период. Но, мислам дека господинот Курти е целосно информиран од нашиот амбасадор во Приштина, г. Лајчак и г. Ескобар, дека ќе мора да направи некои промени доколку сака да смета на нас како пријател и партнер. „Не се сеќавам дека некогаш сум видел толку длабоки поделби во односите меѓу Приштина и Вашингтон“, нагласи Хил.
Тој очекува претседателот на Србија „да направи се што може за да ја деескалира ситуацијата“.
„Сметаме на него како добар партнер, тој и неговата влада се добри партнери во овој процес. И се надеваме дека така ќе продолжи. Би сакале да направи се што може за да ја деескалира ситуацијата и гледаме дека тоа веќе се спроведува. Тоа е многу позитивно. Бев присутен на разговорите (со Ескобар, Вучиќ и Лајчак) пред некоја вечер и можам да ви кажам дека тие ја надминаа актуелната криза во Косово. Мислам дека има разбирање со властите во Србија како да се оди напред, да се прават работите заедно, се надевам дека и народот на Србија ќе разбере дека сакаме многу повеќе да соработуваме политички, економски, на полето на безбедноста. Ние сме многу заинтересирани за подобрување на односите со Србија – барем колку што е заинтересиран народот и владата во Србија за тоа. Чувствуваме дека Србија станува се подобар и подобар партнер за нас“, изјави Хил.
Коментирајќи ги последните локални избори во Косово, американскиот амбасадор вели дека „никој не очекувал дека излезноста ќе биде толку мала“.
„Мислам дека некои луѓе очекуваа дека излезноста ќе биде мала, но не очекуваа дека ќе биде само 3,75 проценти. И мислам дека многу брзо стана очигледно, би рекол на сите, дека со ваква излезност немате причина да продолжите. Јасно е дека овие податоци загрижија многу луѓе, јас сум секако еден од нив“, рече тој.
