Кремљ во понеделникот соопшти дека наводната германска воена лента покажувала нејзини членови како разговараат за воздушни напади на руска територија и се прашуваат дали канцеларот Олаф Шолц ги држи работите под контрола.
Минатата недела руските медиуми објавија аудио снимка за која тврдат дека е од состанок на високи германски воени претставници на кои се разговарало за оружје за Украина и за потенцијален напад од Киев на мост на Крим, што ги натера руските власти да побараат објаснување.
„Самата снимка покажува дека Бундесверот конкретно разговара за плановите за воздушни напади на руска територија. Не бара никакво правно толкување. Сè е повеќе од очигледно“, изјави портпаролот на Кремљ, Дмитриј Песков.
Германија објави дека го истражува видеото, а Русија го повика на разговор германскиот амбасадор.
„Тука треба да откриеме дали Бундесверот го прави ова самоиницијативно. Тогаш се поставува прашањето колку Бундесверот е под контрола, а колку Шолц ја има ситуацијата под контрола? Или тоа е дел од политиката на германската влада?“, продолжи Песков.
„Двете сценарија се многу лоши. И двете повторно го нагласуваат директното вклучување на државите од колективниот Запад во конфликтот околу Украина“, додаде портпаролот.
Германија е една од членките на НАТО која ја снабдува Украина со оружје, вклучително и тенкови. Русија го обвинува „колективниот Запад“ дека ја користи Украина за прокси војна против себе.
