Посветеноста, за целосна и непречена имплементација на обврските на двете страни утврдени во Договорот од Преспа, беа тема на разговор на билатералната средба на премиерот Димитар Ковачевски со неговиот грчки колега Киријакос Мицотакис во рамки на Економскиот форум Делфи.
Ковачевски на средбата со Мицотакис, на која присуствуваа и вицепремиерот за економски прашања Фатмир Битиќи и директорката на УЈП, Сања Лукаревска, нагласи дека со воспоставеното партнерство засновано на доверба и пријателство односите меѓу двете земји се трансформираа во сојузништво потврдено и со членството на Македонија во НАТО.
– Економската соработка помеѓу двете земји традиционално е на високо ниво, a соработката има потенцијал и понатаму да се развива и се поттикнува со континуираниот политички дијалог на највисоко ниво и со градење на довербата во интерес на двете земји – рече Ковачевски.
На средбата стана збор за постигнување договор за олеснувања во доменот на даночните политики и дополнително беше констатирано дека градењето на цврсти економски односи и унапредување на билатералната соработка е важно, особено во услови на светска криза.
За време на разговорот, информираат од владината Прес-служба, двајцата премиери уште еднаш ја потенцираа важноста од соработката во енергетскиот сектор, за која се согласија дека има голем потенцијал, ако се земат предвид заедничките проекти за изградба на терминалот за течен нафтен гас во Александруполи, како и гасното поврзување помеѓу двете земји.
Заедничките енергетски проекти се од значење за Република Македонија како нови извори за снабдување со гас како поеколошки и поевтин енергенс, како и од можноста да стане регионален центар за понатамошен транзит и дистрибуција на гасот на земјите од регионот.
На средбата беше разговарано и дека во периодот кој следи ќе продолжат со интензивна меѓусебна комуникација за унапредување на економските односи помеѓу двете пријателски земји, а со крајна цел обезбедување на побрзa и одржлива соработка за економски раст.
Тема на средбата беше светската криза предизвикана од воената агресија на Русија врз Украина и за потребата од заедничка соработка за ублажување на последиците од растот на цените на енергенсите за граѓаните и стопанството.
