Предлогот за уставните измени е доставен до Владата и откако таа ќе го разгледа на некоја од наредните седници, меѓутоа не подоцна од крајот на овој месец, ќе го достави до Собранието, изјави денеска премиерот Димитар Ковачевски од Вилнус каде учествува на Самитот на НАТО.
На прес-конференција, Ковачевски посочи дека уставните измени не се под никаков диктат, туку се дел од обврските наведени во Преговарачката рамка што во јули минатата година била усвоена во Собранието без ниту еден глас „против“. Тој рече дека никој нема право да ја кочи државата и дека до 2030 година Македонија треба да стане членка на ЕУ.
Коментирајќи ги најавите на лидерот на опозицијата Христијан Мицкоски дека ги прекинува разговорите за уставните измени, Ковачевски нагласи дека секој има право да се изолира себеси, но не и да ја изолира државата.
Премиерот останува на ставот дека треба да се отвори дискусија бидејќи се работи за исклучително важна одлука за државата.
– Уставните измени се глас за ЕУ и за продолжување за европскиот пат. За првпат имаме ситуација во која ветото не доаѓа однадвор, туку одвнатре. Секој има право да се изолира себеси, па дури и да изолира дел од својата политичка партија, но нема право да ја изолира државата. Нивната реторика којашто беше гласна цела една година, на денот на лидерската средба веќе престана да постои. Сите услови на лидерот на опозицијата беа прифатени. Потоа веројатно под некаков притисок, внатрешен или не знам каков, ретерираше во своите ставови – вели Ковачевски за Мицкоски.
Лидерот на опозицијата Христијан Мицкоски викендов изјави дека ги прекинува сите средби со власта за уставните измени и дека единствено за што може да се разговара се предвремени парламентарни избори оваа есен.
фото: МИА
