Во екот на зголемените тензии на северот на Косово поради насилниот влез на специјалните единици и градоначалниците во три општини во петокот и конфликтот меѓу Србите и припадниците на КФОР на почетокот на оваа недела, наводен повик до граѓаните на „марш на север“ од средата се шири на социјалните мрежи на албански јазик.
Косовската полиција денеска ги повика граѓаните да ги игнорираат ваквите повици, наведувајќи дека се целосно способни да обезбедат безбедност за сите граѓани.
Од полицијата велат дека се запознаени со наводите кои се најдоа на неколку социјални мрежи.
„Од различни поединци и профили кружат соопштенија со кои се повикуваат албанските граѓани да учествуваат на наводен масовен протест денеска во 12 часот во Јужна Митровица, наводно со намера да маршираат кон северот на државата“, велат од КП.
Објаснија дека оценката на безбедносните институции е дека всушност се работи за сомнителни профили и „злонамерни објави“, „на штета на сопствените граѓани и интереси на Косово“.
Според тоа, тие ги повикаа граѓаните да останат смирени и да не наседнуваат на наводни организации на непознати лица, јавува Ќосев.
Истовремено, порачуваат граѓаните да остават на безбедносните институции „професионално да се справат со ситуацијата“.
„Ние им гарантираме на граѓаните дека институциите на Косово воопшто, а особено косовската полиција се целосно способни и посветени да гарантираат безбедност, ред и мир за сите граѓани без разлика“, велат тие.
Тие истакнаа дека ја ценат соработката и поддршката на граѓаните во одржувањето на мирот и стабилноста.
Да потсетиме, вчера приштинските медиуми објавија дека и албански рапер испратил покана до граѓаните да се приклучат на протестот, во кој изјавил дека е „подготвен да се бори од Тирана до Косово“.
За разлика од полицијата која наведува дека се работи за протест со намера „да маршираме кон северот на државата“, ова лице ги повика граѓаните за денеска во 12 часот со порака „да маршираме на север“.
