Полето Ковикта ќе стане најголемото наоѓалиште на гас во Сибир, а најважната рута за транспорт на гас ќе работи со полн капацитет, изјави рускиот претседател Владимир Путин за време на церемонијата на официјалното пуштање во употреба на споменатото наоѓалиште и на новиот дел од гасоводот „Моќта на Сибир“ низ кој тече гас за Кина. Путин присуствуваше на церемонијата онлајн.
Полето Ковикта е најголемо во источен Сибир, со проектирани резерви на гас од 1,8 трилиони кубни метри и гасен кондензат од 65,7 милиони тони.
Руските медиуми пишуваат дека веќе е изградена гасоводната делница Ковикта-Каханда, долга 804 километри која се повезува со гасоводот „Моќта на Сибир“.
Ова е вториот дел од гасоводот„Моќта на Сибир“, кој ја снабдува Кина со гас. Првиот – од полето Чајандинск во Јакутија до Благовешченск (границата со Кина) – беше лансиран во 2019 година.
Се проценува дека вкупниот обем на испораки на гас ќе се зголеми на 48 милијарди кубни метри гас годишно, а земајќи го предвид рускиот гасовод „Моќта на Сибир 2“ и неговото продолжување низ Монголија – гасоводот „Сојуз Восток“ извозот на гас во Кина може да се зголеми за уште 50 милијарди кубни метри годишно.
