Ситуацијата во Косово е нестабилна и лесно може да ескалира, вели командантот на КФОР Ангело Микеле Ристуќа, додавајќи дека КФОР е подготвен да реагира на сите настани на теренот. Тој посочува дека е потребно политичко решение за мир и стабилност на Косово и дека НАТО го поддржува дијалогот меѓу Белград и Приштина под покровителство на ЕУ и со поддршка на САД. КФОР, вели тој, останува посветен на својата мисија – да гарантира безбедна средина и слобода на движење за сите луѓе во Косово.
Командантот на КФОР, генерал-мајор Ангело Микела Ристуќа, на таа функција е од октомври 2022 година, а во октомври годинава ќе му ги предаде должностите на новиот командант, кој ќе дојде од Турција, потсетува Демостат.
На брифинг со белградските новинари, Ристуќа зборуваше за актуелната безбедносна ситуација, особено во светло на инцидентите на северот на Косово на 29 мај, кога беа повредени војници на КФОР.
Тој посочува дека е неопходно политичко решение на косовското прашање и дека на двете страни им е потребна волја тоа да се постигне преку дијалог, под покровителство на ЕУ и со поддршка на САД.
Како што вели, клучен е конструктивниот пристап на двете страни, за да се создадат неопходните услови за долгорочна стабилност на Косово и во регионот, за доброто на сите народи, но и на идните генерации.
Тој додаде дека настаните кои се закануваа да ја поткопаат стабилноста бараат огромни воени и дипломатски напори за повторно воспоставување на помирна и порамномерна ситуација.
„Тие само потврдуваат дека политичкото решение може да донесе траен мир и стабилност во оваа област. Многу настани, особено оние од 29 мај, потврдуваат дека се потребни политички решенија. Ова е причината поради која НАТО и КФОР целосно го поддржуваат дијалогот со посредство на ЕУ и САД“, рече Ристуќа.
На прашањето на Демостат дали постои поголем ризик од нови конфликти, тензии и инциденти на северот на Косово по неуспешниот круг од дијалогот меѓу Белград и Приштина во Брисел, Ристуќа вели дека ситуацијата е нестабилна и дека постои голема недоверба, но дека факт е дека преговарачите од двете страни седат на преговарачка маса по инцидентите на 29 мај, позитивно.
Комплетниот текст за командантот на КФОР можете да го прочитате на порталот Демостат.
