Јадењето овошје и зеленчук што не се измиени може да ве изложи на штетни бактерии присутни во почвата или пестициди кои се користат во земјоделството. Дополнително, постои можност заедно со овие производи да консумирате и инсекти кои се собрани.
Миењето на овошјето и зеленчукот помага да се отстранат нечистотиите и бактериите кои може да се присутни на овие производи. За поцврсти производи како компири и лубеница, може да се користи четка со крути влакна за да се допре до жлебовите и пукнатините на површината, пишува livestrong.
E. coli, листерија и салмонела се најчестите бактерии поврзани со болести предизвикани од храна.
Во многу случаи, симптомите вклучуваат гадење, повраќање, дијареа и абдоминална болка. Во потешки случаи, труењето со храна може да предизвика откажување на бубрезите, менингитис, па дури и смрт.
Американскиот центар за контрола и превенција на болести проценува дека 48 милиони луѓе се разболуваат од труење со храна во САД секоја година.
„Ризикувате кога консумирате некое овошје или зеленчук што не е правилно измиено“, истакнува експертот Тоби Амидор. „Иако се преземаат сите мерки на претпазливост од фарма до маса и процесот е многу добро регулиран, секогаш постои шанса да внесете штетни бактерии“, додаде таа.
Најзагрозени се луѓето со ослабен имунолошки систем, децата на возраст под 5 години и трудниците.
Како правилно да се мијат овошјето и зеленчукот?
Правилното миење на сите намирници, вклучително и оние означени како органска, локална и не-ГМО, може да го намали ризикот од штетни бактерии и пестициди.
За миење храна дома, ФДА препорачува седум чекори:
1. Мијте ги рацете 20 секунди со топла вода и сапун пред и по подготовката на свежото овошје и зеленчук.
2. Исечете ги оштетените или згмечените места на овошјето и зеленчукот пред подготовка или консумирање.
3. Исплакнете ја целата храна со вода пред да ја излупите.
4. Нежно тријте ги овошјето и зеленчукот под чиста вода. Нема потреба да користите сапун или детергенти.
5. Користете четка за зеленчук за чистење на тврдиот зеленчук (како јаболка, лубеница, краставици и круши).
6. Зеленчукот исушете го со чиста крпа или хартија. Ова ќе помогне да се отстранат сите преостанати бактерии.
7. За зеленчук како зелена салата или зелка, отстранете ги надворешните листови.
Откако ќе ги измиете овошјето и зеленчукот, безбедното складирање го продолжува рокот на траење и истовремено го намалува ризикот од развој на штетни бактерии. Амидор има три едноставни совети што можете да ги следите:
1. Чувајте го фрижидерот поставен на 4 степени или пониско.
2. Ставете ја во фрижидер целата храна што е купена претходно исечена или излупена.
3. Овошјето и зеленчукот чувајте ги подалеку од сурово месо, живина и морска храна
Кога купувате претходно подготвено и претходно исечено овошје и зеленчук, обрнете внимание на тоа како продавачот ги складирал. ФДА предлага сите претходно исечени овошја и зеленчук да се чуваат во фрижидер или на мраз пред да се купат.
