Состојбата на реките во Србија не е редовна и можно е да има излевање особено во Савскиот слив, изјави утрово климатологот Владимир Ѓурѓевиќ.
Ѓурѓевиќ за Српската радио-телевизија изјави дека според сегашните прогнози не се чини дека ќе има сериозни поплави како оние од 2014 година, но дека треба да се внимава.
„Не сме во крајно критична ситуација, но треба да се има одредена претпазливост со оглед на тоа што имавме големи акумулации на врнежи во Хрватска и Босна и Херцеговина. Обилни врнежи имаше низ Савскиот басен и во Словенија. Таа вода едноставно треба да оди некаде и ќе оди преку Србија“, вели климатологот.
Републичкиот хидрометеоролошки завод (РХМЗ) издаде предупредување дека на 19 мај нивото на водата на Сава кај Шабац може да ја надмине границата за одбрана од поплави, а Ѓурѓевиќ наведува дека ова е само прво ниво на предупредување.
„Во одреден момент ќе имаме повисок водостој од вообичаено, на некои места ќе биде над границата за редовна одбрана од поплави. „Можеби ќе се приближиме до следното ниво на предупредување, но според сегашните прогнози, ова не треба да биде екстремна ситуација, како поплавите во 2014 година“, рече тој.
МВР синоќа соопшти дека по обилните врнежи нема жртви, но дека интервенирале на територијата на Нови Сад, Беочин и Сремски Карловац, потоа во Зрењанин, Шабац и Ваљево.
Две лица се евакуирани во Коцељево кај Ваљево каде се поплавени десет куќи.
Поплавите во претходните денови најмногу ги зафатија Италија, Хрватска и Босна и Херцеговина.
